Deputetët e Grupit Parlamentar të Partisë Demokratike të Kosovës, Ganimete Musliu dhe Rashit Qalaj, përmes një konference për media kanë bërë të ditur se PDK ka ndërmarrë nismën për hartimin e Projektligjit për pensionimin e zyrtarëve policor të Policisë së Kosovës dhe punonjësit e Inspektoratit Policor të Kosovës me autorizime policore.
Kjo nismë për hartimin e këtij projektligji, nga grupi parlamentar i Partisë Demokratike të Kosovës, është bazuar në nenin 79 të Kushtetutës së Republikës së Kosovës, nenin 5 pika 1 (1.2), nenit 8 të Ligjit Nr. 04/-l-025 për Nisma Legjislative dhe të nenit 53 të Rregullores së Kuvendit.
“Duke e ditur se Policia e Kosovës edhe pse është policia më e re e themeluar në Evropë, ajo fatkeqësisht nuk është e re edhe me moshën e zyrtarëve të saj. Mosha mesatare e Policisë së Kosovës kalon moshën rreth 47 vjeç andaj është e domosdoshme të bëhet shqyrtimit i këtij projektligji në afatin sa më të shkurtër kohor, në mënyrë që edhe të veprohet sa më shpejt që është e mundur nga Kuvendi, duke i marrë parasysh pikërisht shqetësimet që adresohen përmes projektligjit”, ka thënë deputetja Musliu.
Më tej, ajo ka shtuar se krahas draftit të projektligjit të cekur më sipër, Grupi Parlamentar i PDK-së ka përgatitur edhe Memorandumin shpjegues të tij, kanë mbledhur nënshkrimet e nevojshme dhe sot do ta procedojnë atë në Kuvend.
“Ky ligj, përcakton njohjen e së drejtës në pension për zyrtarët policorë të Policisë së Kosovës dhe punonjësit e Inspektoratit Policor të Kosovës me autorizime policore, familjarët e tyre, si dhe kriteret dhe të drejtën për pensionim. Ky ligj rregullon dhe përcakton kushtet dhe kriteret për garantimin e pensioneve, llojet e pensioneve, si dhe përcakton kategorizimin e pensioneve për pension për zyrtarët policorë të Policisë së Kosovës dhe punonjësit e Inspektoratit Policor të Kosovës me autorizime policore dhe familjarët e tyre”, ka përfunduar Musliu.
Ndërkaq, deputeti Rashit Qalaj ka treguar disa prej arsyeve pse ky projektligj duhet të mbështetet nga të gjitha grupet parlamentare në Kuvendin e Kosovës.
“Është shumë e nevojshme që sa më parë që është e mundur ky ligj të vije në Kuvend, por, arsyeja kryesore është që Policia e Kosovës të investojë në gjeneratat e reja. Mosha mesatare prej 47 vjetëve tregon se policia është e vjetër dhe ka nevojë të rinohet. Ka shumë policë të vjetër me sëmundje të rënda, të cilat ua pamundësojnë që të kryejnë detyrat ashtu siç kërkohet. Po ashtu, Policia e Kosovës ka njësi të shumta ku shërbejnë mosha të ndryshme. Edhe ata kanë nevojë të përtrihen”, ka thënë deputeti Qalaj.
PDK kërkon mbështetjen për këtë projektligj edhe nga Grupet tjera parlamentare dhe si i tillë duhet të votohet nga të gjitha partitë politike, thuhet ë komunikatën për media e PDK-së.
